Ustaria Tschlin

La realisaziun d’ün nouv lö d’inscunter cul nom «Ustaria Tschlin» es ün dals plü importants intents da nossa società.

I dess nascher ün nouv lö per ir a baiver ün cafè o üna biera, per giodair bun damangiar o simplamaing per star da cumpagnia. Tuots dessan esser bainvis: indigens, societats, giasts da vacanzas, turists, giasts da la Chasa Tschlin e natüralmaing eir tuot ils partecipants da nossas occurenzas.

Prodots regiunals e specialitats

Culs prodots locals da Bun Tschlin dess l’ustaria preschantar la tradiziun culinarica da la regiun e pussibiltar uschè als giasts da giodar tipics trats indigens.
L’ustaria es averta dürant 5 dis l’eivna (inclus la fin d’eivna). Üna pitschna carta da menü spordscha differentas boccadas dürant l’inter di.

Plazzas da lavur illa regiun

La gestiun da l’ustaria chi spordscha plazzas da lavur ad indigens as dess in princip sviluppar ad ün affar autonom. Manar üna simla ustaria in möd economic nun es però uschè simpel, impustüt na dürant la prüma fasa. Perquai güda nossa società a metter in pè il manaschi in tuot ils möds pussibels, impustüt eir in möd finanzial.

Ün’ustaria ill’anteriura chasa da scoula

L’ustaria vain realisada ill’anteriura chasa da scoula a Tschlin. Il Cumün da Valsot fabricha our dal plan terrain da la chasa da scoula ün restorant chi vain dat a fit al mainagestiun da l’ustaria.

Pass da planisaziun per l’avertüra

  • A la radunanza cumünala dals 13 december 2023 es la fabrica per la realisaziun d’üna ustaria sül plan terrain da l’anteriura chasa da scoula da Tschlin gnüda approvada unanimamaing. In favrer 2024 cumainzan las lavurs da construcziun.
  • Cun Sergio Moreira da Ramosch, ün cuschinunz fich motivà, cumpetent e simpatic ha nossa società chattà ün stupend mainagestiun per l’Ustaria Tschlin.
  • Per pudair cumplettar il team da lavur per l’Ustaria Tschlin vegnan tscherchadas ulteriuras persunas. Fich jent pon interessentAs s’annunzchar pro nos president Peder Andri Arquint (p.a.arquint@bluewin.ch) o directamaing pro Sergio Moreira  (moreiranaeff@gmail.com).
  • Pel mumaint es nossa società vi da la lavur finala dal concept da gestiun sco eir vi da l’acquisiziun d’apparats necessaris per l’ustaria. Ils contrats tanter la società, il cumün e la società da gestiun da l’ustaria sun gnüts conclus la fin d’avrigl.
  • L’Ustaria riva sias portas ils 30 da gün 2024!