L’idea
Cun dar ün sguard inavo ill’istorgia vain consciaint vaira svelt cha a Tschlin es la musica adüna statta da grond’importanza. Cun «musica in cumün» dess Tschlin dvantar ün vair cumün da musica.
Differentas activitats sco cuors da musica, concerts ed otras occurrenzas dessan rinforzar il program cultural existent e promouver uschè ün turissem chi s’orientescha a la cultura.
Concerts
No lain metter in bal üna pitschna seria da concerts chi ha üna colliaziun culla tradiziun da musica da las Alps. Tschlin dess dvantar il lö chi’s va a tadlar musica alpina autentica ed innovativa. La lunga tradiziun da las societats da cumün nu dess gnir concurrenzada, dimpersè rinforzada. A la società «musica in cumün» staja ferm a cour da collavurar cullas societats existentas.
Ustaria Tschlin – ün lö per star da cumpagnia e giodair
Sch’ün cumün nun ha ün’ustaria manca simplamaing alch, o na? Dal 2022 es gnüda serrada l’ultima ustaria a Tschlin. Perquai less «musica in cumün» realisar ün nouv lö d’inscunter, nempe l’«Ustaria Tschlin». I dess nascher ün nouv lö per ir a baiver ün cafè o üna biera, per giodair bun damangiar o simplamaing per star da cumpagnia. In colliaziun culla Chasa Tschlin as dess fuormar ün lö chi unischa cultura, cumünanza e culinarica.